معطة الفيس

طبعا ما كلمتكم جدولي حق القراية باظ 😭😭 على قدر الامكان بحاول الحق الوضع لمن اخلص الكورس ده حزغرررت في نص الجامعه
وبخصوص البهدلة الحاصلة في الفيس الايام دي طبعا انا وقفت تعبير عن رأيي في الفيس محافظة على ضغط دمي لكن التحرش واللبس ده موضوع طوويل وغلط من الاتنين انتي كبت البسي كوويس ما عشان زول عشان روحك وعشان ده واجبك وحق ربك عليك ما تلبسي كويس عشان خايفة يتحرشوا بيك اخلصي النية لله صراحة اللبس بقى كعب شدييد وانا بشوف جزو من صحباتي بيعملوا كده برضو وزعلانة عليهم بالجد ما عاملة نفسي احسن منهم لكن هم كانو يوم احسن من كده .
وبالنسبة ليك انت يالولد على قول صحبتي الله يخسف الارض بالرجال😂😂😂 يااخ خلينا من الله امرك بغض البصصر يااخ ياااخ لو ما قدرت عديل كده عايين،لكن فضلا يدك وباقي جسمك ده ابعدو لانك حتبقى زول مقرف بس وحيووان بس جاري ومادي لساانو اسي الفيديوهات الحايمة دي كلكم زي الحيوانات انكبيتو حتستفيدو شننو حتفهمو شنو اصلا في الجوطة دي وشفت بوست ولد قال دي حركة معروفة وبتنعمل كل مرة يا سلام على التربية طيب تعال انت يالما عملت شي معاهم بس اتفرجت اها انت راجل كده وانت خالي عيال توتو بتحرشو ببت ناس اوعك تقول لي تستاهل يااخ يمكن ما عندها فهم في الكلام ده يمكن الله يهدييها من النخوة انك تساعهدها حتى ولو غلطانة
تعالوا لي بجاي يالبتقولوا انها عملية كيزان اها طيب افترضنا الحركة دي ما من شيمنا ومسرحية مفروض تستنكروها طيب مش كان مفروض تدوقوهم وتبشتنوهم ما حصل ككده ده دليل انو مرض جوواكم وانتو كنتوا محتاجين شرارة بس
الله ما خلاكم قوامين على النساء على الفاضي فاتذكروا الحاجة دي واتذكري انتي يا بت انك مقصرة في حق ربك وحق روحك واوعك توجعي راسنا بموضوع انا لو حمت عريانة هو ماليهو دخل بي اي هو ماليهو دخل بيك لكن انتي في دولة مسلمة مفروض تنقبضي طوالي ويشوفوا بنفذوا معاك ياتو حد رادع

يعني اقرا محاضرة كلها عن المخدرات وانواعها وانا ممتحنة الناس دي كانها بتقول لي ادمن ولا كمان قريت معلومة جميلة عن النيكوتين القاعد في السجاير انو low dose بيخليني مركزة زيادة واقرا وسعيييده كمان هاتوا لي سيجارة يا جدعان 💃💃

من انا؟

بسم الله الرحمن الرحيم
انا طالبة طب المستوى الثالث من السودان دي برااها معاناة 😂😂 المهم ما علييينا .
السؤال الخلاني شنو افتح مدونة وحعمل فيها شنو ؟
اول شي ما حعمل شي كبيير حتكوون بس حياتي واهتماماتي المافي زوول بيسمعها ، ايوا مافي زول بيسمعها يا يتجاهلوها او يضحكوا عليها الحكاية دي ازمتني شديد في البداية خصوصا من صحبااتي لكن اسي اتجاوزت الوضع حفرغ الطاقة الجواااي هنننا
ما لازم العيب يكوون فيييك،اذا ما لقيييت الصديق التنسند علييهو ده نصيبك بس والجاي احسن ان شاء الله
مرات كتيرة بتحس بالوحده ما بتلقى زول تحكي ليهو همممك ما بتلقى زول بيتذكررك بكلمة حلوة بموقف جمييل مرات بحس نفسي اني نكررة ليه ما خليت بصمة في قلوب الناس الحولي هل العيب فيني لا العيب ما فيني انا واحده عادية بتعامل بكل اريحية طيب ليه ما لقيت الصديق اليفهمني واليحبني وهل حلقاهو في يوم ما
طبعا كآبة من اول يوم 😂😂 نفسيات امتحانااات ما كلمتكم عندي امتحان سي ان اس الله يستتتر يااخ كرهني القراية حرفيا اكتر كوورس قريت فيييهو لو ما جبت معدل حلووو انا حفكر جديا اشوف لي مهنة تانية غير الطب اصلا انا مقتنعه اني حقتل البششر ده ما عقل طبيبة نهائي 😀